經濟不景，鬍鬚曾上個月先啱啱將全年經濟修訂為負百分之五點五，身兼經機會成員同行政會議成員嘅中大校長劉遵義尋日就公然打對台，大力唱好經濟，話本港第三、四季經濟將錄得正增長，○九年拉勻只會負增長百分之一。佢不惜摑鬍鬚曾一巴都要唱好經濟，其實暗啞底係撐自己，事關佢年初已預言年中會復甦，所以死撐到底。
不過，佢強調，並唔係因為近排樓、股逆市向好而唱好經濟，提醒散戶呢啲只係熱錢作怪，炒家賺到錢就會撤資，佢仲引述一名美國投資者嘅贏錢座右銘：「I always sell too early」。即係叫人咪咁早出貨？咁依家係咪股民出貨嘅時機呀？劉遵義叫大家自己諗。
雖然佢擺明同政府唱反調，但劉遵義尋日都留定後路，話佢係採用季節性調整嘅計法，同港府略有不同。點都好，半年後就會知到底係鬍鬚曾一錯再錯，定劉遵義錯而不認！