本文重點
政制及內地事務局局長林瑞麟日前以局長身份赴台，不過，首日訪問已經有啲尷尬，唔知點解，呢次官式訪問嘅地點揀喺酒店，連台灣記者都忍唔住追問雙方官員點解唔喺陸委會開會？會後，雙方決定成立民間對口溝通機制，台灣記者又紛紛啄住林公公問香港有乜高級官員參與？即使佢話係主要官員，記者都繼續點名追問會唔會係財爺定政務司司長或者更高？好似林公公呢個首位訪台問責局長唔夠高級咁！
僅喺酒店開會規格低
林公公應台灣陸委會邀請赴台，但副主委傅棟成卻揀喺酒店同佢開會，而唔係招呼林公公去陸委會。台灣記者問點解有呢個安排，傅棟成輕描淡寫咁「遊花園」，話喺酒店開會更方便，至於官式會面喺酒店進行會唔會有損規格等，佢就冇答到。
會後，雙方各自宣布設立一個負責港台溝通嘅機制，不過，機制講明係民間組織，港方官員會以顧問成員團形式參與，台方官員亦會以適當身份及方式參與。搞笑嘅係，陸委會嘅新聞稿話港府會派「高層官員」作顧問，林公公就話係主要官員，台灣記者大概搞唔清乜嘢叫主要官員，跟住一輪嘴追問林公公港方嘅「高級官員」有幾高級？
有記者更點名問係咪財政司司長同政務司司長，甚至更高級嘅官員？林公公梗係唔會答到底邊啲官員去做顧問啦，淨係話主要官員會參與。按港府嘅規格，問責局長都係主要官員，即林公公本人已經有資格參與呢個機制，偏偏台灣記者繼續追問乜嘢「幾高級」官員，似乎林公公呢類局級官員未夠資格。
港台溝通踏出第一步後，未來嘅合作可能愈嚟愈多，港府遲啲公布溝通機制嘅名單一定好受關注。