睇勻全世界，有邊度侵犯版權可以做到好似香港咁大模廝樣吖？除咗香港，又有邊度畀人侵權嘅苦主要靠自己付出巨額訴訟費用去討回公道吖？梗係啦，執法部門有法不依，對侵權行為隻眼開隻眼閉，不法之徒仲唔乘機博懵去到盡咩！

東方報業集團前記者高潤添○五年採訪一單市民食咗有毒帶子不適送院嘅新聞，未經僱主同意，擅自將獨家相交畀其他傳媒。刊登於《東方日報》頭版嘅相片，同樣出現喺《蘋果日報》等報紙同埋佢哋嘅網站，簡直離晒大譜。

點知東方向警方、海關同廉署舉報，佢哋好似冇咗件事咁，四年都冇一個部門採取行動。當局唔做嘢，東方惟有循民事訴訟向涉事傳媒機構同記者索償，雖然日前東方獲判勝訴討回「最終的公道」，但訴訟費已經使咗過百萬，同所得嘅賠償根本唔成比例。咁搞法，你話侵權行為有乜辦法唔猖獗吖！

叮！咁仲有王法嘅？東方明明係苦主，貼錢打官司已經夠無奈啦，依家法庭判東方勝訴，鐵證如山，有關部門仲唔執法，到底係想打擊侵權定係要維護侵權㗎？

嗱，涉案記者將東方獨家相片外洩，有冇涉及金錢或者其他利益輸送，淨係呢點，廉署都有責任查清查楚喇。正如法律界人士所講，「連第一步都唔做，就永遠唔會有第二步」。廉署闊佬懶理，同縱容犯罪有乜分別？

東方報道快人一步，求真求實，亦因為咁，多年嚟一直成為侵權行為嘅直接受害人。早喺九六年，《蘋果日報》擅自盜用當時東方旗下刊物《東方新地》嘅「王菲懷孕乘飛機」獨家相片同雜誌封面。後來，《蘋果日報》侵犯東方版權罪成，勢估唔到，法庭居然判東方要替侵權者支付巨額堂費，東方最終要上訴到終審法院至得直。

叮！政府保護知識產權得把口噏，執法部門處理侵權懶得就懶，拖得就拖。東方就話擇善固執，堅持透過法律途徑討回公道啫，普羅市民畀人侵權，除咗啞忍，又有乜可能保護到自己吖？

正因為當局有法不依，執法不力，香港侵權至會氾濫成災。專做廚具設計同生產嘅汪先生，因為專利產品設計畀人盜版，向海關舉報。點知海關搵出N個理由拖延，擺明想佢知難而退。汪生唔忿，惟有自己攞錢出嚟打官司。佢過去十年循民事訴訟告其他公司盜用自己嘅設計，已經使咗成千萬，但攞番嘅賠償只得兩百萬左右。

身為過來人，汪生都話民事訴訟係一場燒銀紙嘅賭博，分分鐘攞唔番公道仲要倒貼。對付侵權嘅人，只有刑事起訴至有阻嚇作用，但海關淨係保護啲名牌，「明顯係大細超」。

叮！香港地告侵權行為要靠自己，咁呢個政府要嚟把鬼吖？執法部門成為侵權嘅幫兇，保護知識產權成為一句廢話，香港仲邊度有公義吖！