行政會議召集人梁振英（CY）一直被視為下屆特首嘅參選人之一，近排佢愈嚟愈高調，遇有重大政策就會喺網誌寫嘢，政界都將佢當年話「N屆都唔選（特首）」嘅言論拋咗落垃圾桶。尋日，CY出席一個兩岸論壇，大講當年嘅內幕，披露○三年個人遊同其後嘅專業人士入內地發展，佢都有份搞。CY葫蘆入面賣乜嘢藥，你自己估啦！
據佢講，○三年沙士襲港後，本港經濟奄奄一息，老董就指派CY同兩名特首辦官員上京斟談CEPA，尤其係個人遊措施。CY話，當日係禮拜日，天氣好凍，內地一個高官問佢：「有香港人顧慮個人遊引起治安問題，到底港府諗定未？」CY拍晒心口，話如果中央願意放行，一切唔係問題。
愈講愈興奮下，佢連六年嚟推動專業人士打入內地都講埋，話初時畀人鬧冇嘢攞嘢嚟做，依家專業聯盟十大業界中，一半依家喺內地搵錢多過香港。佢仲話，中港融合喺香港政壇一度係「Dirty words」（被厭惡的字），最後都係事在人為啫。