立法會係議政嘅莊嚴場地，但新一屆議會組成後，多咗好多火藥味，氣氛亦愈嚟愈火爆。尋日立法會就全面檢討問責制進行辯論，有潮州怒漢之稱嘅「金勞詹」詹培忠動真火，同社民連嘅「長毛」梁國雄公然對罵，搞到立法會主席休會調停。
金勞詹尋日發言時已唔點名批評啲泛民議員淨係識鬧人，到提議案嘅社民連黃毓民總結發言超時，主席又嗌唔停佢，金勞詹就更加火滾，企起身警告主席要「後果自負」。話口未完，長毛即刻幫拖，質疑何謂後果自負，又質疑金勞詹有恐嚇之嫌。
兩人喺議事廳唇槍舌劍，好似小學生咁拗咗約三分鐘，會議被迫中止。休會期間，白鴿黨副主席劉慧卿都好㷫，火上加油咁叫金勞詹同長毛兩個各自攞支槍去決鬥，唔好阻住會議進行。金勞詹即時拍晒枱指住佢大罵：「你哋講就得，人哋講就唔得？」最後，金勞詹同長毛畀主席嗌入房調停，擾攘咗五分鐘，個會先可繼續投票。
講開尋日嘅會，啲議員鬧到一眾副局、政助一文不值，唯獨近排擔正豬流感疫情記者會嘅食衞局梁卓偉幸免於難，得到議員正面評價。