立法會議員要活喺陽光中，事涉公共開支都要申報，連日有關佢哋申領醫療津貼嘅消息曝光之後，有議員質疑秘書處點解會公開晒佢哋嘅病歷私隱，其中一名「受害人」、保險界嘅陳健波更立即向秘書處反映。不過，原來佢怪錯人。
事關秘書處早就喺申報指引寫明，議員可自行將當中嘅個人資料用黑筆塗去，唔知啲議員或助理唔熟例，定係冇刨清楚，令啲個人資料百分百曝光，咁唔賴得人啫。事後，陳健波即刻叫助理刪除有關資料，並提醒其他同事可以咁做，不過因為膝痛而申領津貼嘅白鴿黨李永達就話唔會咁做，以免畀人以為佢有啲不可告人嘅暗病喎。
其實班議員除咗要着緊自己嘅個人私隱，亦都要留意埋啲助理嘅私隱，因為有新丁議員幫助理申領人工同強積金津貼時，都唔記得刪除佢哋嘅姓名同身份證號碼，如果搞到畀人向私隱專員公署投訴就好肉酸囉。