畀機會蘇錦樑做騷

富貴黨三個議員近排喺立法會接連出招，副主席張宇人早前喺行政長官答問大會上，率先要求當局寬免旅遊界嘅牌費，結果獲政府接納；另一個副主席方剛本身代表零售界，同旅遊及消費業關係好密切，過去半年佢大搞消費券同零售界大聯盟，喺業內人氣愈嚟愈旺。

尋日連Miriam都登埋場，佢喺立法會質詢政府有乜措施協助旅遊業界發展，政府啱啱先宣布紓困措施，佢嘅質詢好似畀機會商務及經濟發展局副局長蘇錦樑做騷咁，結果蘇錦樑食住上，大講政府嘅優惠。佢哋呢一問一答配合得天衣無縫，明眼人一睇就知佢哋只不過提醒旅遊界人士感恩戴德啫。

不過，Miriam本身代表交通運輸界，豬流感為呢個行業帶嚟好多麻煩，但佢尋日冇關心自己本業，反而關心嚟緊旅遊界將有好多從業員失業，問政府會唔會設立特別貸款畀旅遊界職員暫渡難關，實在有啲奇怪。

阿Paul做鵪鶉蝕底

富貴黨分裂後一度有啲驚惶失措，最近前主席田北俊又爆出路線之說，Miriam尋日嘅行動顯示佢哋似乎有意將黨務集中喺核心行業，旅遊界就係佢哋三個功能界別議員嘅大平台，所以富貴黨三子近排好似全部變咗旅遊界議員咁。佢哋狂攻之下，旅遊界代表阿Paul好似冇晒聲氣，再唔急起直追，支旗一定畀人搶咗都似！