之不過，申訴專員黎年啱啱上任冇耐，考評局主席顧爾言唔知攞景定贈興，好似硬係唔炳唔安樂咁。去年高考英文科聽力考試指示唔清唔楚，申訴專員公署接獲約一百宗投訴，比前年大增三倍。

正所謂新官上任三把火，黎專員喺咁多單涉及試卷出錯嘅投訴中搵咗幾單出嚟，落足火力重炮狂轟考評局八宗罪，直斥該局人員「粗心大意」，對工作「得過且過」，「不思改進的態度實極不可取」，補救措施「頭痛醫頭，腳痛醫腳」等，真係大快人心呀！

其中高考英文聽力考試最離譜，當中一題要求考生用「獺v或「×」去指示邊啲物品可以攜帶，原意係「獺v代表帶得，而「×」代表唔帶得，但由於指示唔清楚，令人誤會「獺v或「×」都係代表可以攜帶物品。考評局呢劑衰咗，為咗補鑊，結果兩個答案都當啱。

而另一條高考物理科題目亦錯得騎呢。試題要求學生計算「Ｔ」嘅值，但題目冇定義「T」係乜，所以考生將「T」解作「張力」又得，解作「周期」又得，考評局又衰咗，又係兩款答案都得。叮，居然咁都發雞盲睇唔到，可見出題嗰班友仔係幾咁冇心裝載吖。

申訴專員公署指出，試題錯漏多籮籮，係因為負責覆核試題工作嘅評核發展經理，同時又兼埋試卷擬題員，角色上有衝突所致。而所有試題要兩次試做同九次校對都仍然出錯，亦反映咗考評局做嘢得過且過。

被申訴專員公署炳鑊甘，顧爾言都唔係第一次㗎嘞，咪死死氣咁拍晒心口話接納公署建議，並且會作出適當嘅跟進，加強指引列明編製、覆核及校對試卷人員嘅職能以及權責，提升服務質素咁話喎。

算罷啦，黎年初嚟埗到，已經一眼睇穿考評局係「意見接受，錯誤照舊」啦，直斥該局職員對錯誤滿不在乎，更加唔太願意認錯。鬼咩，考評局職員出錯試題又唔使處分，劑劑錯咗就話兩款答案都啱，咁就梗係繼續得過且過啦。

叮！考評局出錯都唔係一年半年嘅事啦，幾乎每年都爆蝦碌嘢出嚟，而且推陳出新，唔見試卷、亂咁評分已經係小兒科啦，最弊係出題一時Shit、Damn、Suck、What the Hell，一時「見鬼勿O嘴」、「潛水怕屈機」，搞到考生無所適從。

嗱嗱嗱，話口未完，今年高考經濟科考試之嘛，又被人發現有兩條選擇題出錯咗。明明文字資料講「封閉經濟」，但只係畀咗「開放經濟」嘅數據，由於文字資料同數據九唔搭八，結果要刪除兩條選擇題。

叮！莘莘學子寒窗苦讀，都係為考個公開試，考評局慌死唔跣到考生攤攤腰，年年如是整個窿等考生踩落去，知唔知對考生前途有幾大影響呀？顧爾言都算係黑心嘞，相信叮爆佢個鎯鎯，全港考生都會拍爛手掌唔會O嘴！