科大校長朱經武八月離任，而佢太座陳璞尋日現身科大，宣布以爸爸、即一代幾何大師陳省身名義，成立全球數學大獎—陳省身獎，將由國際數學聯盟頒發，級數相當於數學界嘅諾貝爾獎，獎金由朱太自掏腰包攞五十萬美金（約三百九十萬港元）出嚟，獎項每四年頒一次。朱太話爸爸生前落力推動數學發展，好想盡點孝心紀念吓佢。
朱太係資優兒童，佢話爸爸自細冇特訓秘方，但體內嘅數學基因細細個就爆發出嚟，三歲識得解答小六學生雞兔同籠嘅數學題，連爸爸都嚇一跳。但佢呢股才華自三歲後就走下坡，所以長大後冇揀做數學家，而係去修讀物理，仲因而認識老公朱經武添。
自細喺美國讀番書長大嘅朱太，唔識睇中文，偏偏爸爸鍾意去中國餐館請客，所以佢立志要搵一個識中文嘅老公幫手睇餐牌點菜，朱經武因為中英文了得，就係咁奪得佢嘅芳心嘞！