尋日喺中環遇到香港體育學院主席Eric李家祥，問起有冇中招，佢話屋企收藏咗一隻爸爸留低嘅金勞「家傳之寶」，好有紀念價值，幸好隻金勞至今仲保持得好新淨，運作暢順，毋須維修。即係冇中招啦！

收埋隻金勞唔戴，睇怕佢手腕戴住嗰隻都係名錶喇啩！點知佢伸隻手出嚟，戴緊嗰隻竟然係某銀行嘅紀念錶。會唔會係贈品嚟㗎？

Eric話對戴錶冇乜要求，睇到時間就得嘞。咁佢都講得冇錯，隻錶顯示嘅時間好準確，但尋日係六月二號，佢隻錶顯示嘅日期係五月二十九號，相差成幾日，反映佢真係齋睇長短針。

講到金勞，唔少人聯想起立法會議員「金勞詹」詹培忠有冇中招，佢澄清呢個綽號純粹因為佢有架金色勞斯萊斯豪華房車，金勞就冇嘞。佢又話以前閒閒地都戴幾十萬嘅錶，但依家希望低調啲，戴幾萬蚊貨仔就算，總之戴上手好睇就會買，唔理係乜嘢牌子。