連日翻查議員嘅醫療津貼申領表，發現班議員唔係有肩周炎就係有膝頭痛，就連一向深諳養生之道、由十幾歲開始打坐嘅立法會保險界代表陳健波都患有血壓高，身體狀況認真麻麻。
陳健波解釋呢個係遺傳病，佢就算點養生都避唔過，好彩病情好輕微，但血壓隨住年紀慢慢遞升，所以佢喺四年前決定服藥控制血壓。除咗呢個斷唔到尾嘅遺傳病外，佢話已經成年冇病過喎！
眼見班同事身體咁差，佢都有啲擔心，所以不時會充當健康大使宣傳做運動嘅重要性。佢都係立法會研究雷曼事宜小組委員會成員，得悉做主席嘅何鍾泰忙到一日只瞓得三、四粒鐘，佢都忍唔住話何鍾泰「過度勤力」，又話聽人講佢喺立法會永遠係最後一個離開，咁樣當然會過勞啦，覺得佢應減輕工作量先得。