「旅遊超人」阿Paul謝偉俊早前隨立法會個考察團去廣東省考察，佢話成日都會同白姐姐嚟廣東玩，仲話喺中山大學附近嘅金海灣有個單位，依家就丟空咗嘞；又話考察團有晚夜遊珠江，當條船去到中山大學附近時，佢都有望多兩眼，本來諗住順便去個單位睇吓，但行程太緊密惟有作罷。
「絕唔係箍煲之旅」
阿Paul同白姐姐嘅感情生活曲折離奇，兩個人關係最穩定嘅時候可能係結伴出外旅行。遲啲立法會休會，佢會同白姐姐去英國愛爾蘭散心兼遊玩，仲話一早計劃好，絕對唔係「箍煲之旅」。佢哋兩個人最鍾意旅行加睇樓，唔知今次係咪有意喺愛爾蘭置業呢？阿Paul就笑笑口話到時睇樓都唔出奇。
