港大民意網站定期為香港政團做民調把脈，今年五月份嘅調查結果尋日出爐，十大政團嘅評分上升居多，但社民連同民建聯就做咗「逆市雙葩」，評分齊齊大跌。
工聯會評分最高
調查結果顯示，工聯會評分最高，職工盟排第二，得分都超過五十分；至於三個月前排位第三嘅民建聯，評分下跌一點七分，得番四十八點七分，跌出五大之列，排名第六；社民連仲大鑊，急跌四點二分，以三十九點六分掹車邊排喺十大政團之末，排位倒退兩級，係民調計劃自○七年二月開始為社民連評分以嚟嘅歷史低點。
民調機構指社民連排名大倒退，好可能係同部分成員涉及「粗口事件」有關喎。社民連同民建聯平日喺議會敵我分明，估唔到喺今次民調會做咗難兄難弟。