黎年尋日初試啼聲，首次以申訴專員身份見記者。呢個新「包青天」同前任比起嚟，有啲人會覺得係跌watt，事關黎年講嘢冇乜火氣，表情仲可以用木訥嚟形容，更加談唔上有乜嘢「金句」，最弊嘅係佢竟然露底。

咁快就露底？講嘅係「煲冬瓜」，即係普通話。話說有講普通話嘅記者問佢對政府計劃成立金融申訴專員點睇？金融申訴專員講咗都一段時間，問題字眼唔算生澀，但黎年聽到耳都側埋，仲反問：「講乜？」

主任提場照出醜

見狀，身旁嘅調查主任即刻出手打救，話係金融申訴專員呀！跟住黎年先如夢初醒，話關於金融嘅投訴，應該有其他渠道處理。係咪答得好順呢！梗係啦，佢呢幾句唔係煲冬瓜，而係廣東話。好明顯，佢聽唔明煲冬瓜，亦講唔掂。

跟住繼續係煲冬瓜問題，記者再問雷曼迷債投訴，呢次調查主任識主動提場：「係問雷曼。」但都救唔到黎年，黎年將雷曼兄弟講成「瀰漫兄弟」，仲講咗三次咁多，搞到在場人士好多都忍唔住低頭偷笑，最辛苦係佢隔籬嘅調查主任，相信佢忍得好辛苦。

有記者會後問佢對今次開記者會有乜感覺，佢只係講咗三個字—「好新鮮」。相信在場嘅記者都有同感，尤其係佢嘅煲冬瓜。

香港回歸就快踏入第十二個年頭，但特區官員或法定機構阿頭好多時喺公開場合都講唔掂煲冬瓜，真係好尷尬。查實，黎年曾經做過廉政專員，屬於特區主要官員，每年都會上京同中央官員會面，亦會訪問一啲對口單位，以佢咁嘅煲冬瓜水平，唔知同中央官員點溝通呢？