話口未完，本港尋日又多三宗豬流感確診個案嘞，其中一位十七歲中五女生早前由加拿大經南韓返港。佢就讀嘅匯基書院（東九龍）要即時停課十四日，考試要延期，其他集體活動亦取消，同佢有親密接觸嘅同學、教職員同家人都要服用特敏福。
依家全港累計確診個案已經有十五宗咁多。衞生防護中心總監曾浩輝大派定心丸，話確診個案全部由外地傳入，不過亦唔排除患者有機會將病毒傳染畀人。佢仲話，爆發社區感染不過係遲早問題。
豬流感殺入學校，呢次唔係講玩。本港已經連續七日出現確診個案，而且數字正不斷上升，初時一日一單，依家一日就有三單，證明口岸防疫已經冇辦法阻擋病毒長驅直入，當局必須採取更有效嘅措施拖延社區爆發，等市民有充分時間「備戰」。
呢個中五女生喺飛機上好地地，並冇出現病徵，入境嗰陣又可以通過體溫檢查，回港之後仲照樣返學校參加畢業禮綵排添，呢段時間入面，相信已經接觸過唔少人。萬一畀班衞生官員講中，有其他人領咗嘢，疫情就可能迅速擴散，形成社區爆發。
好似早兩日發現嘅第十宗確診個案咁，五十六歲女患者遊美返港之後，三日內行勻港九新界，由馬鞍山、油麻地再到中環，商場、食肆、寫字樓全部去齊。再講，依家每日都有由美加、日本呢啲「重災區」飛嚟嘅航班，上面有冇人中招冇人知，幾多人中咗招更加冇辦法計。
叮！乘客抵港之後，只要冇發燒就可以直入市區，然後各散東西。嗰啲未被發現嘅豬流感患者，就好似一個個「流動疫彈」咁，周圍飛嚟飛去，遲早會爆大鑊。
更得人驚嘅係，暑假就快到，唔少喺美加、澳洲、日本留學嘅香港同學仔都會返嚟度假。試問食衞局局長周一嶽，豬流感個案大幅增加嘅風險，你有冇充分考慮過？除咗「哀求」佢哋唔好返嚟之外，又有冇其他對策去應付呢？
早兩日，有立法會議員建議規定公共交通工具乘客要戴口罩，但周一鑊一方面承認交通工具有傳播風險，但又話毋須咁做，因為目前豬流感殺傷力較溫和，要到冬天至「最受考驗」。民間有人建議為疫區返港嘅人開設特別通道，但港府直到依家都冇採納。
叮！人哋出謀獻策，周一鑊當聽唔到，自己又攞唔出有效嘅防疫措施，結果搞到豬流感病毒愈行愈近，確診個案愈來愈多不特止，仲「遍地開花」添。係咪要等到疫情喺社區大規模爆發，你至肯做嘢吖？
咪話唔提醒你吖周一鑊，唔該醒醒定定，拿拿臨做番啲實際嘢去堵截漏網之魚，如果豬流感全線攻陷本港，防疫前功盡廢，你一定烏紗不保㗎。叮！