擁有五匹良駒嘅仁愛堂前主席史立德，當然識得睇準時機「掃平馬」。香港逾千匹競賽馬中只有百分之七係未經閹割嘅雄馬，佢早前以二百幾萬元嘅超筍價，喺歐洲買入一匹「完整」嘅雄馬，仲話太太覺得女人想搵個好老公，而佢亦認為難得隻馬係馬圈中少見嘅「真漢子」，所以就改「好先生」呢個一語雙關嘅名。
「好先生」不負所望，三月首次出賽就攞亞軍，之後表現大勇，贏到唔少獎金，史立德話扣除買馬、養馬同畀練馬師嘅打賞後都仲有賺。
今個星期日馬場有個盃賽，屬於二千四百米長途賽，到時「好先生」會出戰賭王何鴻燊嘅「爆冷」、今年香港打吡大賽冠軍「閒話一句」，同上屆冠軍「包裝大師」等。史立德話「好先生」擅跑長途，對佢好有信心，但到時鹿死誰手，就要落場跑過先知喇。