瞓晒身搞體育嘅港協暨奧委會會長霍震霆，除咗將體育基因遺傳畀三個仔外，更精心特訓阿仔上位做體育界接班人，但霍公子教仔唔興揸住雞毛掃，而係身教，即係畀個人辦啲仔睇。
早兩日就有個活生生嘅例子。霍公子出席美國商會午餐會主講香港嘅體育發展，赫然發現阿仔啟剛同啟山都在場，咪以為佢哋嚟做「保鏢」跟出跟入，查實係老竇用心良苦。
霍公子話啟剛係奧委會副秘書長兼天津市政協，下屆東亞運動會喺天津搞，學定嘢係遲早嘅事；至於啟山就係小型足球會會長，多啲接觸體育界中人絕對有需要。啟山講嘢口脗似足老竇，佢話東亞運動會舉行在即，表面睇嚟好簡單，實情係背後仲有好多嘢搞，佢仲擅長搞推廣宣傳，不時靜雞雞喺背後幫爸爸分擔辛勞。
不過，都要兩個仔有跟住老竇學嘢嘅心先得嘅，否則老竇拿住支雞毛掃打到雞毛都甩晒，佢哋都未必肯嚟啦！相信啟剛同啟山口講話未有準備接棒，其實個心不知幾Ready。