今屆立法會嘅聯絡小組早前開會，建議喺嚟緊九月組團出訪捷克、克羅地亞同匈牙利，理由係這東歐三國都係新興民主國家，其政改經驗值得香港參考。
呢次東歐團全程十至十二日，估計每人使費最少要成三、四萬元，如果坐商務客位更加可能高達六、七萬，八個免費名額即係要成四、五十萬，分分鐘一鋪過就使晒今屆四年任期預留嘅四十九萬五千元外遊撥款，可謂機會難逢、一瞬即逝。
為免班同事再次爭崩頭，聯絡小組決定沿用第二屆立法會嘅準則，以類似比例代表制嘅方式分配，將六十名議員按其政治聯繫分為四大組別，「圍威喂」瓜分呢八個名額。
睇番呢四大組別，D組嘅競爭最激烈，富貴黨、工聯會、專業會議、五散人、3L、詹Sir二人組、再加六名單丁建制派，二十六人爭三個位，名副其實係一場大混戰。