播放本新聞相關短片

政情：李慧琼唔反對囡囡從政

舊年十月新一屆立法會啱啱開波時，唔少新丁議員都先後大爆蝦碌。李慧琼尋日接受電視訪問時，自爆喺大半年前首次開立法會大會時發生嘅瘀事，原來佢當日一早約咗人喺附近午膳，點知佢一路好留心咁開會，開開吓先突然發現過晒鐘，仲反問其他同事：「乜唔係有午膳時間嘅咩？」查實立法會係接連咁開會，冇午飯同晚飯時間㗎！

佢仲話做咗立法會議員大半年，發覺真係會冇晒私人時間，依家最多只得星期日同公眾假期陪到屋企人，如果將來囡囡話要從政，佢唔會一刀切反對，但亦會同佢講清楚並講解當中嘅得着同代價。