本文重點
呢排聽得最多嘅係3L立法會議員林健鋒早前搞爛Gag搞出禍，要擺和頭酒向商務及經濟發展局前局長馬時亨道歉，但係咪咁就一筆勾銷？暫且撇開佢哋之間嘅瓜葛，依家要講嘅係肥亨自身嘅問題。
肥亨喺舊年七月因腦血管有個波波，以健康理由提前掛冠，離開官場。
唔經唔覺，仲有個幾月就完結一年嘅冷河期，可以重投職場。佢最近仲透露嚟緊會有新搞作，不過做啲乜或加入邊個機構？佢話要先賣個關子喎！
搞文娛康樂 冇利益衝突
老實講，呢排因前高官再就業嘅問題激起民憤，就連金管局總裁任志剛早前出席立法會相關委員會，都畀議員追問喺十月退休後會唔會加入私人機構，任總當時斬釘截鐵話絕對無意。肥亨係個醒目嘅人，當然諗到呢點。
既然肥亨話復出有新搞作，我哋不妨介紹吓啲冇利益衝突嘅筍工畀佢，例如頂咗任總個位啦！雖然大家都傳會由特首辦主任「攞命陳」陳德霖接任，但外界批評政府用人唯親嘅罵聲愈嚟愈大，財爺鬍鬚曾最後怯於民意換人都講唔定，肥亨話晒係前財金高官，依家仲做埋港大經濟金融學院榮譽教授，夠晒資格啦。
再講，西九管理局早前宣布會就行政總裁一職進行全球招聘，薪酬條件好到具國際水平嘅人士都會爭住做，肥亨如果擔心做金管局CEO壓力太大，不妨諗吓搞文娛康樂，做西九CEO。
全職侍奉主 一定冇壓力
如果要發揮佢喺政治方面嘅長處，又可以考慮幫行政會議召集人CY梁振英呢個疑似特首候選人助選，做其競選辦CEO囉，反正早兩個星期喺一個籌款晚會上，CY開晒口話肥亨休養咁耐，係時候復出咯。
身為基督徒嘅肥亨其實最啱就係做主嘅僕人，佢太太王培琪本身係教會組織「全城更新」嘅主席，馬太搞親活動多數都同老公拍住上，肥亨全職侍奉主，就一定係最冇壓力嘅選擇喇。