話口未完，嘉道理道一棵十五公尺高嘅木麻黃樹打橫冧落馬路中心，咁啱有架私家車經過，當堂壓到正。不幸中之大幸，只係壓爛咗私家車嘅擋風玻璃，司機冇受傷。
康文署發言人依然咁厚面皮，死雞撐飯蓋話喺上個月檢查過呢棵樹，發現乜嘢問題都冇。但一棵樹好好地無端白事會自己冧落嚟？康文署賴得就賴，將冧樹責任卸晒落連日大雨導致泥土鬆散所致！
叮佢個鎯鎯，全港樹木都畀大雨淋啦，又唔見全部冧晒？康文署只不過係求其搵個藉口掩飾佢哋嘅無能之嘛。
嗱，赤柱刺桐樹被蟲蛀到臭晒，康文署聲稱檢查過好多次都發現「冇問題」，出事前一個星期嘅健康狀況仲可以接受添，結果壓到一個港大女生當場慘死。
前日何文田巴富街嗰棵大樹，康文署喺去年已經接獲區議員投訴，後尾發現棵樹有啲傾側，署方單憑外部觀察以及檢查，又係發現「冇問題」，結果係點？咪又係轟隆一聲冧落嚟，壓毀一架的士囉。如果棵樹冇問題都冧得，九成九係樹木有靈性，見到康文署署長周達明做嘢懶懶閒，當堂激死呀！
其實邊係冇問題吖，有附近學校嘅校長踢爆康文署吹水唔抹嘴，佢話好少見到該署人員巡查樹木，而學校對面斜坡上仲有兩棵樹就冧就冧咁樣，一直都冇人理，隨時壓親學生。
鬼咩，據知情人士講，康文署只係得一百個受過專業樹木護理訓練嘅員工，之但係該署依家管緊七十六萬棵樹。本來人手已經好緊張，點知署方仲將佢哋調咗去做園景設計、泳池以及室內運動場呢啲九唔搭八嘅非林木工作。難怪康樂事務職員總工會主席張兆榮呻人手嚴重不足，好難確保樹木安全。
最弊係周達明唔踢唔郁，一踢又郁到過晒龍。自赤柱慘劇後，康文署同其他政府部門採取「有殺錯、冇放過」策略，應該做嘅樹木護理唔去做，唔應該斬嘅樹就斬清光。短短三個月，已經殺咗超過二千棵樹，好多古樹名木都死得不明不白。
仲有呀，當局對本港樹木蟲蟻侵蝕及周邊結構呢啲潛在危機闊佬懶理，喺行人道旁邊、公路邊、斜坡嘅大樹又唔做足安全檢查。天文台一早警告過今年會有五個颱風襲港，家陣落幾場大雨已經搞到冧樹無日無之停不了，到真正殺到，橫風橫雨嘅時候，樹木分分鐘變成大殺傷力武器！
叮，政務司司長唐英年呢個管樹大隊長搞咗幾次跨部門會議，大樹照舊話冧就冧，固然難辭其咎，最低能嘅仲係康文署，驗樹又唔識，種樹又亂嚟，病樹任得佢冧，好樹反而斬清，簡直係廢柴管爛木，香港做咗「冧樹之都」！