香港律師會換莊，新任會長王桂壎（圖）尋日帶埋新副會長葉德禮同傳媒會面，新官上任三把火，王桂壎都有意體現新人事新作風，佢話關注業內出現「不成功、不收費」作招徠嘅意外索償代理問題，未來會設立一條電話熱線，畀市民查詢索償問題。
為咗呢個新猷，佢仲打埋友情牌，搵咗一百五十位有相關經驗嘅執業律師，義務提供至少一個鐘嘅法律諮詢服務，條熱線會喺周一至周五、辦公時間運作，仲有真人接聽，打電話去嘅市民只要留低個人資料同聯絡方法，一個工作天內就有律師聯絡。
講到律師去內地發展一事，佢就話，本地律師喺內地最缺乏就係人際網絡，年中開始，律師會計劃每年同深圳市律師協會理事會開一次聯席會議，唔再好似以往握手食飯就算數，佢仲呼籲業界先放眼最近香港嘅泛珠三角地區。