人類豬流感肆虐一個月後，蹤迹已經遍布五大洲，香港人防疫意識甚高，醫管局主席胡定旭更係表表者，日前佢出席一個飯局時，就即場教人防疫之道，只見佢喺西裝袋攞支酒精洗手液出嚟，然後向身邊嘅人大力推介，仲周圍倒啲水出嚟，嗌同枱食飯嘅人最緊要洗手或清潔雙手。肥胡嘅防疫絕招雖然好簡單，但唔係人人都可以抄到足嘅。
因為肥胡用嗰支洗手液大有來頭，係醫管局專登訂番嚟嘅，而且醫管局已經掃清光，市面根本冇得賣。呢支洗手液點解咁巴閉？一般市面嘅洗手液都係啫喱狀，用嘅時候難免黐立立，但肥胡嗰支就係水狀嘅，使用嘅時候好乾爽，最重要係，呢支獲得世界衞生組織認可嘅洗手液每支售價僅係三元，正所謂又平又靚。
肥胡經常出席大大小小飯局，睇佢食飯前咁純熟攞支洗手液出嚟倒，似乎已經形成洗手、洗手、洗手嘅習慣。佢係醫管局主席，稱得上係醫管局生招牌，如果每去一個飯局就公開示範洗手防疫，都可以收身教重於言教嘅效果，仲可以做另類宣傳添，難怪肥胡話防疫最緊要係洗手喇！