好多直選議員逢年過節都會搞啲冧選民嘅活動，白鴿黨立法會議員李華明近日就準備向獨居長者送糉，等佢哋感受吓節日氣氛。但佢哋裹糉安排似乎有欠衞生，搞到畀居民投訴，據講，佢哋年年都畀人投訴，指摘肥仔明縱容義工喺佢油塘邨議員辦事處門外公眾地方包糉，仲將啲包糉材料擺放在坑渠邊，結果屋邨保安員要強行清場。
現場所見，有十多個義工幫肥仔明包糉，個個無戴口罩，甚至連手套都無戴就徒手拿起糯米放喺荷葉上，而一大盆糯米同材料就放喺坑渠邊，旁邊仲放咗多把掃把，又好難怪被居民投訴嘅。肥仔明解釋話，年年都被人投訴包糉唔衞生和阻街，其實包糉位置並非太阻居民出入，至於講到啲糉唔衞生，攞去酒樓蒸熟咗就自然衞生啦。
啊，咁都得？肥仔明貴為立法會食物安全及環境衞生事務委員會主席，咁冇常識嘅說話都講得嘅？獨居長者如果食咗啲唔衞生嘅糉出事，肥仔明就罪大嘞！