本文重點
千呼萬喚之下，特區政府尋日終於推出新一輪紓困措施，不過，一百六十八億元營造嘅甜味好短暫，民間反應麻麻，財政司司長曾俊華喺記者會上都忍唔住肝火盛。其實，連日來商界不時有唱好之聲，工業總會尋日揀啱時辰，高調發表「企業結業、倒閉潮已過去」嘅偉論，政府原本以為咁多好消息配合紓困方案出籠，社會應該大受振奮㗎，點知政黨、打工仔一聽方案就批評多多，鬍鬚曾嘅期望落空，難怪要公開變臉喇！
調查數據冇權威性
政府財金官員呢排搏命唱好經濟，鬍鬚曾更公開撰文話最壞時候已過，商界已經開始接到定單等，希望平衡吓政黨及市民要求佢派糖嘅聲音，不過，尋日公布嘅上月出口數字又再呈雙位數下跌，連商界人士美化家吓經濟表現嘅言論都顯得好空白。
尋日，工業總會隆重發表《珠三角港資企業調查報告》，派出主席陳鎮仁及副主席劉展灝花足兩粒鐘開記招，提供種種數據大力唱好本港經濟。不過咪開心得太早，呢個調查總共發咗三千份問卷畀工總及其他行業商會會員，收番嘅有效問卷得嗰一百四十六份，計落回覆率連百分之五都冇，調查有幾權威及令人信服真係好值得研究。
至於陳鎮仁話珠三角港商透露自五月以來，定單有逐漸回升趨勢，話口未完，劉展灝已承認港商近期接到嘅定單只係「碎單」，數量不及以前多，亦有壓價情況，只係廠商抱住「開齋」心態， 寧願賺少啲都希望有工開。
佢哋自己都口徑不一，唱好經濟又冇權威數據畀人睇，齋唱好有幾多人信真係要問佢哋至知。或者，鬍鬚曾會聽得好陶醉，仲覺得自己有先見之明，但係唱好嘅目的都係要谷起市民嘅信心啫，家吓大部分市民感受唔到經濟好轉，打工仔亦依然擔心冇咗個飯碗，咁樣嘅好景搵邊個信呀？