嗱嗱嗱，風水佬呃你十年八年，太一叮嘅預言尋日就即刻應驗晒，仲要係一日連冧三棵添呀！
先講何文田巴富街嗰棵大樹，喺尋日凌晨突然冧咗落嚟，壓正停喺路邊嘅的士。裏面嗰位的士大佬福大命大，剛好拉低椅背瞓覺，否則隨時壓到正。
康文署話喎，最後一次檢查呢棵樹係本月十八日，唔使先進儀器，原來只係單憑外部觀察以及檢查，冇發現受到白蟻侵襲，亦冇「即時危險」，由於棵樹有啲傾斜，本來已準備喺今個星期移走，只不過未移走已出意外。
叮佢個鎯鎯，呢班康文署職員嘅專業知識連小學生都不如，睇外面梗係冇事冇幹啦，啲白蟻喺裏面開緊餐，蝕到空晒心呀！不過冇辦法啦，台灣讀一個樹木保育課程要花六年時間，香港呢班所謂管樹專家，天才到可以六粒鐘速成，可能連白蟻個樣係點都未知呀！
呢單冧樹事件係咪有啲似曾相識呢？冇錯，咪就係紅磡庇護工場冧鐵閘殺人事件嘅翻版囉，建築署懶懶閒話冇「迫切性」，拖足大半年先換，結果未換已經壓死人。所以的士大佬今次大步檻過，佢都話要劏雞還神兼用碌柚葉沖涼。
正所謂福無重至，禍不單行，另外一單冧樹事件喺大埔松仔園發生，咁啱得咁蹺，又係有架的士畀冧落嚟嘅大樹壓中，事發後嗰位的士大佬立即打電話報警啦。警員到場之後話冇人傷亡，唔關佢哋事，叫佢搵其他部門搞掂。
叮，點知佢先後打咗去食環署、康文署以及地政總署，冇個部門幫到手，最後要消防員到場先至將冧樹清理妥當，但已經搞咗佢幾個鐘頭，難怪佢怒斥好唔滿意政府咁官僚。
政府處事官僚，唔單止小市民把幾火，連申訴專員都頂唔順，狂數當局行政失當，部門之間協調不足，有錯又唔肯改。咁簡單嘅一棵樹，處理嘅部門竟然有九千幾個，乜署物署，個個都天生A字膊，卸得就卸，棵樹一日未壓死人，想有部門理都幾難！
話時話，乜曾蔭權唔係吹雞成立咗一個跨部門工作小組，由政務司司長唐英年做管樹大隊長咩？佢老哥日前仲好高調咁話，要針對現時樹木管理出現部門互相推莊嘅問題，盡早確定一個負責部門。
算罷啦，港府最叻頭痛醫頭，腳痛醫腳，好似話雷曼爆煲就整個「財經事務申訴專員」出嚟，藥物事故多過乜，就搞個「藥物監管制度檢討委員會」，個個都係有姿勢冇實際。唔好話太一叮睇死吖，呢個管樹大隊長九成九都係做吓樣耍小市民，佢有佢做騷，樹有樹繼續冧。
唐隊長，雨季嚟緊喇，颱風又就快殺到，唔該醒醒定定睇到實。不過以佢嘅能力，怕且靠唔住，不如咁啦，唔該留低個手提電話號碼當熱線，唔使小市民左頻右撲，直接打電話叮爆呢個管樹大隊長啦！