政情：政府拆彈打錯算盤

政務司司長接黑鑊

其實四川正忙於災後重建，邊得閒分心招待班議員四圍貢吖，所以決定只會派專責籌統重建工作嘅常務副省長魏宏來港，向特區政府匯報頭兩期重建工程嘅進度。

特首失言闖禍，仲要下屬執手尾補鑊，將化解今次訪川爭議同爭取立法會通過第三期撥款嘅責任，一腳踢咗畀政務司司長接手。司長尋日向立法會多個委員會嘅正副主席發出請柬，請佢哋喺今晚六點半到官邸同魏宏食飯，希望可以利用副省長做人肉擋箭牌，令班議員放棄訪川同重新支持撥款。

但多名獲邀嘅議員都不滿今次飯局安排得太倉卒，加上最關注重建工程嘅立法會發展事務委員會晨早就訂咗喺今日晏晝開會，最後一個議程仲係關乎新立法會大樓工程，好似逼班議員二擇其一咁。有個別議員表明寧願留喺立法會開會，都唔去司長官邸食飯，政府今次真係拆彈變捉蟲囉。