早前3L嘅林健鋒搞Gag玩大咗，同傳媒講搵咗商務及經濟發展局前局長馬時亨做3L嘅總幹事，又話前勞工及福利局局長葉澍堃會做主席，激到肥亨紮紮跳，唔單止嚴正澄清絕無其事，仲省咗林健鋒一鑊。
激到肥亨出真火，林健鋒梗係要諗計氹番老友，連上禮拜二中環嘅政界Party都甩底唔去，請肥亨去跑馬地著名法國餐廳食飯賠罪，諗住雞髀打人牙骹軟，希望喺把酒言歡間，能夠令肥亨嘅怒火煙消雲散。點知同枱竟然仲有立法會「五散人」嘅會計界議員陳健波，仲有劉慧卿添，原來佢哋四個係一早約好相聚喎！咁似係政治飯局多啲喎，林健鋒「搭單」賠罪，呢餐請得認真抵！
聽陳健波講，肥亨初段猶有餘怒，仲寸爆林健鋒，話如果林健鋒出到一千萬元，佢就做3L總幹事嘞！點知林健鋒駁嘴：「一千萬就冇嘞，畀份遺囑你啦。」肥亨頂番轉頭：「咁我就唔做嘞，不如我介紹王永平畀你吖！」咁嘅場面，算唔算擺和頭酒，都係一個疑問。