本文重點
天文台前台長「黑英」林超英早喺前兩年發出預警，搬晒啲數據出嚟，話半世紀內香港唔使點暖爐，好似新加坡同曼谷咁，冬天不再來。聽完呢番話，市民嘅感覺有幾大？似乎冇乜。點解？可能同黑英嘅演繹方法有關，唔知係咪前車可鑑，佢嘅接班人李本瀅就學精咗，識得轉膊。
同樣係講全球暖化，但李台長就食住端午節個勢，喺個Blog度以俗語話「食過五月糉，寒衣收入槓」為楔子，話好多人問佢近端午天氣暖和，係咪可以收起啲寒衣同棉被？呢個係主婦們最關心嘅問題，睇嚟佢係吼準機會噃。
冇得打邊爐穿冬裝？
李台長同黑英同樣搬出數據，話翻查過去數十年端午節前後嘅氣溫記錄，以二十五度作為舒適嘅晚間最低氣溫，二、三十年前都有一半呢啲舒適日子，但係依家只剩低三分之一。
咁點先？李台長話按目前嘅推算，香港到二○三○至三九年嘅十年間，每年氣溫喺攝氏十二度或以下嘅日數將少於一日，可以話，到時香港再冇冬天，咁打邊爐同穿冬裝嘅日子將一去不返。
老實講，李台長話冇冬天由五十年內縮短到二十年後，仲話可能更早，叫大家要同心協力，遏止全球暖化。
李台長講嘅情況比黑英更嚴峻，但冇好似黑英咁硬繃繃去講，反而施軟功，唔知係咪睇準市民受軟唔受硬呢？
試問吓，香港人鍾意喺冬天打邊爐，貪佢暖笠笠，而女士們竟然冇得換季，咁仲得了？李台長揀中香港人衣食住行中，最重要嘅食同着衫，咁貼身嘅問題，市民嘅感覺會大啲、緊張啲。
之不過，香港依家一年四季都有得打邊爐，夏天都可以開行冷氣照打，潮人喺熱天都着晒長袖衫，究竟李台長呢招軟功係咪奏效呢？