人工。
運輸及房屋局局長鄭汝樺尋日喺立法會吹水，話實施的士收費「短加長減」措施之後，司機收入明顯增加，折扣黨生存空間亦收窄咗。不過，有議員當場篤爆話，收入增加主要係因為石油氣價格回落，唔關新收費模式事，折扣黨依然活躍，政府應該透過立法打擊議價行為。
叫政府做嘢邊有咁易吖，鄭局長即時耍手擰頭，話立法禁止乘客議價會惹起社會爭議，而且舉證有難度，對建議有保留，仲要「小心研究」。唉，嘥氣啦，等佢哋「小心研究」得嚟，香港都唔知變成乜嘢世界咯。
講到呢度真係火都嚟埋，原來政府一聲「有難度」就可以翹埋雙手唔做嘢。好似「公共小巴道路安全駕駛計劃」咁，運輸署、警方大大聲話要打擊小巴超速，但係舉報亡命飛車，居然要乘客自己搞掂，結果啲Van仔咪照樣好似飛彈咁周街飆囉。
十五分鐘由屯門去到上水你聽過未？唔係搭飛機，係坐專線小巴咋。搭過呢啲亡命飛車嘅市民都知道，車速閒閒地超過一百公里，顯示器係咁「咇」，司機當聽歌仔。乘客嚇餐懵之後致電警察交通熱線投訴，點知對方淨係識叫人哋去警署落口供。
叮！打工仔手停口停，個個要搵食，落咗小巴執番條命已經好彩，仲要嘥時間去落口供，咪即係叫人收聲，唔好舉報。再講，超速意外隨時車毀人亡，尤其係小巴，如果坐滿乘客，有事一定大劑。政府消極執法，要乘客出聲投訴至做嘢。萬一真係出事，唔通向閻羅王「舉報」咩。
○四年，兩架通宵紅色小巴懷疑為咗爭客，喺北角英皇道衝紅燈，釀成兩死十八傷嘅大車禍，小巴亡命飛車問題引起高度關注。政府強制小巴加裝安全帶、車速顯示器等措施後，涉及小巴嘅交通意外曾經一度回落，但數字前年開始又掉頭回升，情況一直冇明顯好轉。
因為當局執法疏懶，乘客怕麻煩，息事寧人唔報警，司機一於少理，照超速可也。如果執法部門積極啲主動出擊，譬如引入可記錄行車資料嘅「黑盒」，甚至採用「放蛇」辦法，小巴司機點夠膽想超就超吖。
以前，有的士司機改裝咪錶呃乘客，警方就係靠放蛇呢招，將不良分子繩之以法，啲騙術依家咪絕晒迹囉。其實，警方要對付小巴超速話咁易喇，只要放蛇坐上小巴，車速顯示器一「咇」就攞部手機出嚟影埋相，有齊人證物證，超速司機仲唔斷正？
講到尾，執法部門唔係做唔到，而係根本唔想做。梗係啦，亡命小巴通常半夜最猖狂，班公僕個個身嬌肉貴，慣咗養尊處優，掃蕩色情架步，上馬檻放蛇就話爭住去啫，捱更抵夜放蛇捉超速小巴，仲要搵命博，邊有人肯去吖。
呢個政府正一唔見棺材唔流淚，打擊亡命小巴、醉酒駕駛，都係等爆大鑊至做嘢，依家對付的士折扣黨又係咁，懶字行先。旨意佢哋，死得人多咯。叮！