港府高官成日亂咁講嘢，其中又以政務司司長唐英年嘅經典笑話最多，舊年先用「條條fing」形容被迫流落街頭嘅漢普頓酒店旅客，尋日佢又再次語出驚人，形容樹木檢討報告冇可能好快搞掂時，竟拋出一句「一仗功成」，搞到議員噴飯，再暴露佢嘅短處。
唐唐尋日去立法會內會講解樹木管理，佢初時都緊記言多必失，白鴿黨嘅甘乃威要求佢就六四事件表態，甚至問到金管局新總裁嘅人選時，佢都緊守「少講少錯、唔講唔錯」，闖過第一關考驗。不過，俗語話冇危險先係危險所在，佢講到三個月內就樹木管理政策提交檢討報告時，就大大聲話：「我同我嘅同事都唔敢奢求『一仗功成』。」啲議員笑到噴飯，佢擺明將唐朝詩人曹松嘅詩句「一將功成萬骨枯」斬件嚟用。
講番尋日嘅內會，議員好緊張街頭樹木管理，李慧琼仲即場推個電腦畀佢（圖），要佢睇吓九龍公園有啲樹木失修嘅情況，催促唐唐慢不得。