本文重點
政府高官畀人封為「樹王」，但政壇中有個名副其實嘅「樹王」，就係工聯會立法會代表潘佩璆嘞，佢回歸前喺新西蘭住過五年，屋企後花園有成四分一畝草地，平日打理成三十幾棵樹，佢未出聲，邊個夠膽自封樹王？
與塌樹女死者有淵源
潘佩璆九一年舉家移民新西蘭，九六年先回流返港，嗰五年終日與樹為伴，尋日立法會內會討論樹木管理問題，潘醫生講番呢段鮮為人知嘅往事，自爆自己係業餘樹木愛好者，喺新西蘭屋企嘅後花園，種咗三十幾棵樹，茶花都十幾棵，又有橙樹同蘋果樹。
潘佩璆關注樹木管理唔在講，原來去年赤柱塌樹慘劇嘅死者港大女生莊頌賢，佢嘅醫生父親同家姐，同潘佩璆以及佢個仔，咁啱都係港大醫學院嘅同班同學，莊頌賢可算佢嘅世姪女，慘劇後醫學院同學會登報關注事件，潘佩璆都有聯署。