世界衞生組織早排雖然發出正式公告，將人類豬流感命名為H1N1甲型流感，等全世界人明白呢種病唔係從豬感染嘅，不過呢個學名又長又翹口，港府官員都繼續沿用人類豬流感。尋日立法會漁農界代表黃容根忽然開炮，鬧政府貪方便，唔為豬流感改名，搞到本地豬農生意大跌三成，養豬業界更加畀人歧視添！
世衞正名到依家幾乎兩個禮拜，點解肥根依家先出嚟救豬出生天呢？肥根話，佢嘅右腳膝頭關節有問題，本嚟預算案投票時就要做手術，後尾押後咗，所以佢四月二十七號先入醫院換骨骹，喺醫院住咗十四日，其中六日更係全日瞓床，所以咁耐唔見佢幫啲豬講說話。不過，家吓豬流感嘅名入晒腦，肥根嘅呼籲睇怕都好難受到重視。
講番佢傷愈復出，前日佢已經首次現身立法會一個草案委員會，尋日又撥冗出席內會，現場所見，肥根步履尚算靈活，雖然揸住支拐杖，但都唔使經常用。據佢講，依家每個禮拜返醫院做一、兩次物理治療，平時喺屋企用腳舉沙包，大概兩個月後就可康復。