本文重點
立法會代表商界的勢力分崩離析後，富貴黨同總商會嘅關係備受關注，日前一場選舉暴露富貴黨前主席田北俊支持嘅參選人全軍覆沒。總商會之失似乎令田少充滿危機感，日前佢專登約晤幾個總商會核心同巨頭食飯、摸杯底交心，擺明要修補裂痕，尋日又伸出橄欖枝，反省富貴黨密密上街嘅路線。
據聞富貴黨喺總商會選舉敗北，係常務副主席胡定旭背後遙控發功，透過電郵動員，加上有全國政協常委陳永棋公開叫陣，終於令富貴黨痛摔一跤。田少尋日話總商會唔重視該黨係人之常情，但冇緊密關係唔代表大家冇偈傾。
微調中間偏右路線？
經歷過立法會敗選嘅田少似乎領悟到冤家宜解不宜結嘅道理，佢尋日率先反省，話自從佢冇做立法會議員之後，富貴黨嘅路線亦漸漸偏向中間偏右，親近中小企，同大財團關係疏咗，而且上街抗議密咗。田少話，想當年富貴黨有十個立法會議員時，只係因為銷售稅、負資產問題上過街。
佢話，富貴黨應該喺大財團同中小企之間取得平衡，雖然呢個平衡嘅藝術好高，但多啲溝通，尤其喺一啲影響廣泛嘅條例同大財團尋求共識，對黨嘅發展並冇壞處。田少咁講，無疑係想攞支強力膠修補雙方之間嘅裂痕啫！被問到陳永棋日前建議佢引退，田少就話，佢咁多年嚟積極參與總商會會務，絕唔係「有會唔開」嘅人，人哋引退係人哋嘅決定！
引退近一年，田少今次又為富貴黨同總商會見面，並高調評論未來發展，唔通富貴黨將來都會好似語言教育政策咁微調路線﹖