記憶之中，長實集團主席李嘉誠對傳媒一向都好友善，有問必答，甚少發火。不過佢尋日提到早排畀人屈嗰件事，終於忍唔住點名指摘《明報》設局靠害。
誠哥因乜事扯晒火？咪又係《明報》唯恐天下不亂，老作當新聞囉。記唔記得早排港交所上市委員會擒擒青推出延長上市公司董事禁售期建議嗰單嘢吖？因為有兩百間上市公司反對，港交所焗住要認衰，決定暫緩同修訂有關建議。
港交所順應民意，修正錯誤，本來就正常不過。但《明報》竟然揀喺有關決定公布前一日，晨早流流趁李生離開屋企去打高爾夫球嗰陣，截住人哋追訪。誠哥仲好有禮貌咁絞低車窗答問題，誰知一番好意畀人利用咗。
《明報》跟住生安白造，講到似層層咁，好似港交所係依照誠哥嘅說話去做，成件事係有人策動，畀人一種「隻手遮天」嘅感覺。
叮！難為《明報》成日王婆賣瓜，厚住面皮話自己「公信第一」，連最起碼嘅新聞道德都冇，噏得出就噏。誠哥接受《明報》訪問第二日，港交所就公布暫緩建議，神仙都冇可能喺一日之內轉得咁快啦，《明報》唔止斷章取義，屈得就屈，簡直當市民係白癡。
之不過，呢啲咁劣質嘅老作喺《明報》出現一啲都唔奇。講到新聞同評論，呢份報紙睇唔睇都罷，但係「更正與澄清」嗰欄就最有「睇頭」，記錄晒佢哋老作啲瘀嘢，加加埋埋直頭厚過本電話簿。
嗱，《明報》前年錯咗一百九十三次，其中二十一次道歉。舊年，佢哋又係錯一百九十三次，其中二十三次道歉。今年一到四月，已經錯咗六十二次嘞，有六次要道歉。出錯道歉當食生菜，仲講乜鬼「公信第一」吖，老作第一就真！
講開《明報》老作，至「經典」梗係舊年北京奧運閉幕式嗰單啦。全世界幾十億電視觀眾都睇住英國球星碧咸企喺雙層巴士上面，一腳將個波踢出去，點知喺《明報即時新聞網》就出現另一個版本，話「碧咸乘坐倫敦標誌性的雙層巴士出場，然後跳下巴士，踢着足球衝入人群，在代表國際奧委會二百零五個成員的孩子的圍繞下展示自己的球技，他把足球踢向觀眾，由一名工作人員拾得」。
叮！明明冇發生過嘅事，畀《明報》「加工」過之後，就變成虛構小說。無中生有咁把炮，講大話絕冇口窒，不如轉做講古佬罷啦。公信力都輸清光咯，仲辦乜鬼報紙吖。
唉！學誠哥尋日話齋，《明報》「本來係一家幾好嘅報紙」。查良鏞嗰個年代，邊會發生咁離譜嘅事吖。正所謂將軍一去，大樹飄零，查大俠離開之後，接手嘅一蟹不如一蟹，咪惟有舉住「公信第一」塊爛招牌繼續呃神騙鬼囉。
之不過，一份公信力破產嘅報紙，呃得今日都呃唔到聽朝啦。叮！