侯活超級入樽破騎士不敗身

「野獸」大肆破壞克利夫蘭！魔術中鋒杜域侯活，喺東岸決賽首回合盡現野性，以一下超級入樽震爆騎士主場計時器不特止，更取得30分同13個籃板，帶領魔術作客以107比106反勝騎士，打破對手今屆季後賽不敗金身。

威力太大整爛計時器

魔術中鋒杜域侯活，尋日第一次掂波就「野獸」上身，攞到進攻籃板後，立即施展雙手鋤樽，由於威力太大，結果將籃板後面掛住24秒計時器碌柱都震落地，場館職員立即擔梯搶修，可惜由於破壞力太大，要將另一邊嘅24秒計時器都熄埋，臨時起用兩部手提24秒計時器，足足擾攘咗八分鐘先恢復比賽，最後要到半場先搞掂番個鐘。

占士抖得太耐打到抽筋

雖然騎士冇被杜域侯活影響，半場拋離魔術15分，可惜下半場杜域侯活又嚟料，最後全場射入30分同13個籃板，後來居上打破騎士今屆季後賽不敗身。

賽後杜域侯活對於成功喺克利夫蘭搗亂非常興奮，相反勒邦占士雖然全場射入49分，創出個人同球隊史上季後賽得分新高，但唔知係咪因為抖咗九日太耐，打到第四節居然抽筋，完場後要由職員治理，先可以慢慢行番入更衣室，賽後「大帝」亦承認太耐冇比賽，的確影響咗佢哋嘅表現，不過芝士相信佢哋聽日可以打番場爭氣波，擊敗魔術追成平手，8.5分上盤可以一試。