喺銅鑼灣間名人「飯堂」見到商務及經濟發展局前局長馬時亨喺度歎茶，佢喺席間大談食經，話近年為咗控制血壓，於是積極瘦身，飲食都要少鹽少油，「飯堂」嘅上素蒸粉果、檸檬叉燒酥、生炒莧菜鬆同靚湯至啱佢，「上素蒸粉果」皮薄饀靚，「檸檬叉燒酥」就鬆化得嚟唔肥膩，連肥亨都讚不絕口。之不過，原來肥亨無辣不歡，所以「飯堂」總經理玲姐每次都會為佢準備辣醬。
肥亨把口唔止識食，仲好叻氹人捐錢做善事。早前佢為一個籌款晚會做「籌款專員」，除自掏腰包捐咗三萬蚊，仲做埋棟篤笑幫手揼嘉賓心口，又「出賣」老友，拉埋「廚神」黃坤撐場，最後黃坤用三萬蚊投咗支八二年法國紅酒，另外再自揼心口捐五萬蚊，總算冇令肥亨失望。不過，肥亨話呢次揼心口義舉欠咗好多人情債，有排還，下次唔好預佢喎！