香港律師會尋日改選，副會長王桂壎喺冇對手挑戰下自動當選。熟悉王桂壎嘅人都知佢為人風趣，係一個搞笑能手，律師會過去幾年作風低調、沉實，咁佢履新後有乜大計為業界帶嚟新景象呢？呢個新會長竟然踢爆自己「冇乜大計」。
唔係因為佢「冇計」，而係律師會理事會每隔一段時間都會收集意見，訂下未來幾年嘅工作大方向。啱啱卸任會長嘅黃家純做咗兩年，唔少早前訂落嘅建議都未有時間落實，所以王桂壎上任後就要開足馬力，執行理事會訂下嘅計劃，佢仲講明做律師會會長唔應該搞個人主義：「依家唔係拍電影，唔需要有個人色彩，最緊要係為業界做事！」
王桂壎初出道時曾任政府律師，仲係前行政立法兩局議員辦事處嘅第一批法律顧問，之後成為業內有名嘅英資西盟斯律師行首位華人合夥人，梁愛詩卸任律政司司長一職時，更一度被視為司長黑馬人選㗎！