Chuwi Hi12 12吋國產靚畫新配套

Netflix登陸香港，加埋本地電視台的節目，忽然用平板上網睇電影、電視的選擇多籮籮，試問冇部大芒型號傍身又點得呢？小記真心佩服國產牌子的觸覺，最近便有部行《Windows 10》的Chuwi（馳為）12吋芒Hi12出場，它性價比超高，12吋Retina屏幕外，仲可以同實體鍵盤結合，打破國產平板以往僅得鍵盤保護套這配置，學足大廠玩摺疊翻屏變筆電，係咪好爆呢？

$2,599（連原裝實體鍵盤）

備有磁吸式全尺寸實體鍵盤，可將Chuwi Hi12變成12吋筆電。

支援正反雙插功能，既可連鍵盤變平板使用（左），又能倒立變成分享模式（右）。

「土豪金」全金屬機身的上方中央處有500萬像素拍攝鏡頭。

擴充端子則聚於左側部分，有齊USB、micro USB、micro HDMI輸出及microSD卡槽。

喇叭置於平板底部握位兩側，容易被手掌遮擋。

打直睇《on.cc東網》新聞可幾乎全畫面顯示，而毋須專登放大觀看。

試用Viu TV的OTT平台追看卡通，播放流暢之餘色水亦飽滿自然。

Retina芒色水出眾

大芒國產平板向來於腦場選擇不多，12吋Chuwi Hi12登場自然引起話題。此平板走簡約風格，採用易受落的金色外殼，全金屬機身用上圓渾邊框，仲有銀色幼細切割面圍繞，感覺高雅。擴充端子則位於左側，有齊原尺寸USB、micro HDMI輸出及microSD卡槽。至於喇叭就置於平板底部握位兩側，雖容易被手掌遮擋，但幸好無阻音色輸出。屏幕方面，選用色彩鮮艷的12吋Retina觸控屏，解像度達2,160×1,440，用來睇《on.cc東網》新聞可幾乎全畫面顯示，毋須專登放大觀看，的確唔錯。筆者試過開啟Viu TV的OTT網站，在線追看卡通，可享巨屏寬闊視野之餘，畫質飽滿又不失自然，睇得順眼。

實體鍵盤充滿驚喜

Chuwi Hi12另一驚喜就是打破以往國產平板僅得鍵盤保護套設計，真正附有二合一筆電所用的磁吸式全尺寸實體鍵盤；鍵盤同樣是金色，配以雪白鍵帽及Touchpad，風格跟平板一致。不論鍵帽間隔還是按感舒適度，都遠比雜牌薄膜鍵盤連保護套好得多，仲支援正反雙插功能，可變成倒立的分享模式，可謂開國產機先河。至於硬件方面，Hi12規格合理，行Atom Z8300處理器、內置4GB RAM及64GB ROM，預載Mobile版Word、Excel和PowerPoint，一開機即能處理普通文書工作，只是嫌容量唔夠多，要靠插卡擴充，最多可支援64GB microSD卡，但對於公價賣$2,599的產品而言，抵玩有凸啦！