無論你係唔係「剔牌」嘅粉絲，講到創意，Nike的確係估你唔到、能人所不能嘅境地，最近喺紐約舉行嘅Nike Innovation 2016大會，Nike更加食神上身，一口氣發表咗多項驚喜新作，唔只有真正量產型自動綁帶波鞋HyperAdapt 1.0，仲有Air Zoom KD9、Hyperdunk 2016、Mercurial SuperFly、Air VaporMax、Free RN Motion Flyknit、NikeGRIP及AeroSwift等等。花多眼亂消化唔切？唔使怕，筆者幫大家分好類別，無論你係潮人、籃球迷、波牛或者長跑達人，都可以對號入座，預先Mark定心頭好。

HyperAdapt 1.0

HyperAdapt 1.0嘅最大竅妙，就係結合咗數碼、電子與機械工程嘅鞋底感應器。

Air Zoom KD9

Air Zoom KD9嘅蜂巢形Flyknit鞋面，韌力比以往嘅Flyknit更加高。

Hyperdunk 2016

Mercurial SuperFly

Mercurial SuperFly嘅鞋釘只出現喺主要嘅掂地位置，延續系列一向嘅輕量化傳統。

Anti-Clog Traction

AeroSwift

Air VaporMax

就連外底都剔走嘅Air VaporMax，令用家更直接感受Air Max嘅緩震能力。

Free RN Motion Flyknit

鞋底繼續採用分割式設計，仲加入三角星形紋理，係Free RN Motion Flyknit嘅最大設計特色。

NikeGRIP

NikeGRIP腳底嘅立體織法，靈感來自蜥蜴嘅四肢。

潮人Back to Laceless

HyperAdapt 1.0懶人必Buy

喺《Back to the Future》已經亮相嘅Nike MAG，憑住自動綁帶功能技驚四座，雖然今年初終於開售，不過只限慈善拍賣，數量極少，買唔到先係正常。好彩人生滿希望，喺今次發布會現身嘅HyperAdapt 1.0，可謂真正量產化嘅Nike MAG變奏，呢款新鞋首度採用「可適性鞋帶」設計，當腳踭踩到鞋尾嘅感應器時，鞋帶就會自動索緊，鞋身又有兩粒掣，畀用家自行設定鞋楦鬆緊度，撳個掣就可以Fit晒腳，很想要吧！

籃球部主攻Zoom Air

Air Zoom KD9蜂巢面韌力高

中底改用新款全掌式Zoom Air，喺極短時間內由緩震過渡至回彈，而且針對前後掌嘅唔同需要，前掌氣墊厚度為10mm，後掌增加至16mm。至於Flyknit鞋面改用蜂巢形結構，專門應付籃球運動嘅多向性動作，尤其是Kevin Durant嘅橫向爆發力，韌力超高。

Hyperdunk 2016中空鞋底有玄機

同樣採用全掌式Zoom Air，特別之處係氣墊與外底之間設有中空區，帶嚟彈簧般嘅快速反應。鞋面以Flyknit為主體，前掌結合Flywire，用家進行轉身、切入與跳躍等動作時，都會Feel到額外嘅支撐力。

足球部強化地利

Mercurial SuperFly鞋面大變身

以往嘅Mercurial SuperFly一直標榜平滑鞋面，今代嚟個大U Turn，3D織物鞋面唔只滿布坑紋，而且高度有所提高，目的係加強鞋面與足球嘅摩擦力。至於碳纖鞋底既有輕量化作用，輪廓亦與腳形緊密配合，加上爪形嘅鞋釘設計，抓地之餘，速度上更加收放自如。

Anti-Clog Traction水戰又何妨

落雨踢波，無論你對Boot係圓釘或刀片釘，抓地力都難免削弱，Anti-Clog就喺鞋底注入高分子聚合物，遇水嘅話，表面會變得平平滑滑，減少泥漿黏喺鞋底嘅機會，跣腳Bye Bye。

AeroSwift唔怕拉衫

唔只足球，就連籃球服與田徑服都會應用AeroSwift技術，不過以足球服嘅功效最為突出，除咗重量減少10%、排汗及快乾能力分別增加20%與25%外，最重要係彈性大幅提高50%，唔怕對手拉衫，「剔牌」旗下嘅歐國盃國家隊，將會成為最早嘅AeroSwift用家。

長跑部多線出擊

Air VaporMax直踩更有Feel

以往嘅Air Max鞋款，氣墊與鞋籠之間都有一層泡棉物料，Air VaporMax唔只將會剔走，仲刪除埋橡膠外底，令用家直接感受Air Max嘅表現，而且可以減少重量，以及生產過程中嘅廢料。

Free RN Motion Flyknit醒目變形

靜止與活動中嘅腳掌，尺寸會有微妙分別，新一代Free跑鞋就喺鞋底加設三角星嘅形狀紋理，奇妙之處在於觸地時鞋身長度最多可以變大一個碼，闊度更可變多兩個碼，令每一步都Fit晒腳形。

NikeGRIP凹凸有理

為貼腳，Nike真係無所不用其極，呢款新襪嘅設計靈感來自蜥蜴，腳掌兩側都有防滑設計，最出位係底部織成一條條立體坑紋，增加與鞋墊嘅摩擦，從而提升腳底嘅抓力與穩定性。

文︰Dick（相片由Nike提供）