X系青年軍 BMW X4 xDrive28iA

X4係寶馬（BMW）X家族中最年輕嘅成員，面世未足兩歲，認識佢嘅車迷當然唔及X5咁多，到底X4係乜嘢車型、如何定位？要唔要大家一齊Google吓？簡單嚟講，X4就係X6嘅小型版本，雖然唔係百分百按比例縮小，但廠方都將佢定性為運動型多功能轎跑車（SAC），即係一部車結合咗SUV與Coupe嘅特質，具備高度實用性之餘，亦有卓越嘅操控性能。

離地距比一般私家車高，方便出入崎嶇路段。

多功能真皮軚環備有音響鍵，背後就有加減波按鍵。

波箱採用八前速規格，轉波敏捷流暢。

車尾置物量為500L，將後排完全放平，就可擴充至1,400L。

後排空間有驚喜，尤其是Headroom未有因為C柱嘅傾斜度而受到影響。

原廠選用17吋輪圈，輪胎尺碼為225/60 R17。

將行車模式切換至ECO PRO，有助減少耗油量。

原廠備有Park Distance Control，車身與阻礙物嘅距離一目了然，唔使靠估。

X4嘅設計風格與X6一樣，就似一部車身升高咗嘅Coupe，而X4嘅車體就比X6細啲。

X4嘅賣相帶有Coupe嘅影子，車身高度低於同門X3、C柱傾斜度又大過傳統SUV，不過高個子坐後排，都唔會有頂頭頂腳嘅問題，竅妙係工程師將乘坐位置降低，變相擴充咗Headroom，而更貼地嘅乘坐位置，令人有置身Coupe之內嘅感覺，進一步深化運動形象，而且後排靠背可以完全向前翻平，將車尾置物量由標準嘅500L，提升至最多嘅1,400L，加埋揭背尾門設有電動開閂功能，實用性極高。

擺脫高車身迷思

今次測試嘅係X4 xDrive28iA，屬於同系嘅入門型號，電磁炮威力有幾強我唔清楚，但係X4 xDrive28iA搭載嘅2.0L直四Turbo，唔只有245hp馬力，35.7kgm峰值扭力早於1,250rpm已經全數到位，仲可以一直保持至4,800rpm，基本上已經Cover晒最常用嘅轉數範圍，每次畀油都有澎湃嘅加速反應，所以只需6.4秒就可完成0-100km/h。耗油量就中規中矩啦，廠方公布嘅綜合數值係7.4L/100km，筆者今次揸咗160、170km之後（公路大約佔咗六成），用咗唔夠四分一缸油（油缸容量為67L），對馬力過200hp嘅四驅SUV嚟講都OK啦！至於預載嘅行車模式就有四項選擇，分別為ECO PRO、Comfort、Sport及Sport+，節能與動態駕駛都應付周到，尤其是喺Sport+模式之下，引擎與波箱反應最為靈敏，電子穩定系統嘅干預亦會相對減少，鍾意動態駕駛及操控自主性更強嘅車迷，必Like！

普遍人認為高身車過彎比較「論盡」，唔適合快跑，不過呢個假設早就畀保時捷（Porsche）Cayenne否定。或者有人話Cayenne賣到咁貴，當然要能人所不能，不過我想講，就算係X4呢種中價位SUV一樣好跑得，攻彎平穩性唔會差過同門房車幾多，底盤設定偏向運動化，提供出色嘅抗傾表現，出彎後車身好快就可以歸中，唔會拖泥帶水。比起X6，車體相對小巧嘅X4，彎中動作更加瀟灑，而且導入Performance Control系統，可以按實際需要自動分配四輪動力，過彎時，甚至可以對內彎車輪施加適當力度嘅制動，令轉向更順暢，就算以高速入彎都未有出現轉向不足。