慕尼黑直擊追風白茫茫 Audi R8 V10 Plus

里奧勒度狄卡比奧終於憑《復仇勇者》（The Revenant）喺奧斯卡稱帝，似乎全球影迷仲興奮過當事人，真心講，佢唔係我杯茶，所以冇乜大感覺，反而戲中強調嘅自然光，加埋一鏡過嘅寒冬雪景，個人覺得更有震撼力；早前筆者到德國試車，揸住部性能強悍嘅第二代R8去到慕尼黑南部嘅郊外小鎮，舉目所見，由平原到山頭都係一片白，天蒼蒼地茫茫，與《復仇勇者》嘅取景確有幾分相似，令今次試車別有一番感受。

LED頭燈組底下設有垂直嘅導流槽，加強「破風」效率。

R8 V10 Plus原裝已經有碳纖尾翼，高速時帶嚟充足嘅下壓力。

側鏡冚及門邊導流槽都用碳纖製成，為求瘦身無所不用其極。

C柱油缸蓋鑄上R8標誌，表明超然身份。

賽車用輕量化桶椅，有型之餘，最重要係車速再高都可以穩定坐姿。

5.2L V10 FSI引擎唔只勁力十足，仲有低耗油嘅優點。

三幅式多功能軚環加入唔少功能鍵，務求讓駕駛者盡量保持手不離軚。

MMI系統採用觸控式設計，調校設定清脆利落。

波箱效率之高，冇得挑剔，稍嫌波棍台嘅設計斯文咗啲。

中控台盡量精簡化大玩瘦身，三圈式冷氣控制按鍵使用簡便。

Audi Virtual Cockpit 12.3吋屏幕除咗顯示清晰，仲可以對應導航地圖。

車身長度與高度略為減少，外觀顯得更加緊緻。

去到Garmisch-Partenkirchen試車，四周都係一片雪地，quattro系統加上Audi Magnetic Ride主動式電磁感應懸掛系統就大派用場。

今次試車由慕尼黑出發，以當地南部小鎮Garmisch-Partenkirchen為目的地，雖然未至於電影中嘅密蘇里般荒蕪，但係呢個小鎮唔只冇乜高樓大廈，連人煙都少，對於嚟自香港嘅一班傳媒，就好似發現新大陸。講番正題，今次嘅試車路程約126km，當中包括連接城市與鄉郊嘅無限速公路（Autobahn），以及小鎮之內嘅山野路段。喺高速公路上，R8 V10 Plus嘅5.2L V10 FSI自然吸氣引擎正好盡情Show Off，配合運作敏捷嘅七前速S tronic自動波，加速直接又有爆炸力，而且喺原有嘅四種駕駛模式之外，「Plus」版本仲多咗Performance模式，力量輸出更加渾身是勁，頭段已經搶住Show Quali，當車速超過200km/h，力量依然豐盈。好玩之餘，R8 V10 Plus亦有為環保着想，引擎融入咗節能汽缸管理系統（Cylinder On Demand），當引擎處於低負荷狀態，就會暫停一組汽缸運作，減少燃油消耗，據廠方表示，呢副新引擎比上一代慳咗13%燃油。

ASF硬淨瘦身

天地一片白，有詩意，不過連車身都係白雪雪，影相時真係幾有難度，官圖中嘅R8 V10 Plus至少有紅、藍雙色版本，何解廠方安排「黐晒地」嘅白色車做測試，唔通想考我哋嘅攝影功力？Anyway，唔論顏色，新R8係靚仔嘅！輪廓上大致維持上一代嘅扁平設計，實質上車身高度與長度有輕微減少，而闊度略增，令造型更緊緻、更有力量感。車身用料以ASF（Audi Space Frame）高剛性車架為主軸，當中包括79%鋁合金與13% 強化碳纖，輕量化之餘，剛性比上一代多咗40%。至於醒目Look嘅車頭採用與TT相似嘅六角形蜂巢式鬼面罩，而每邊頭燈組內藏37顆LED，亮度超高。此外，「Plus」原裝已經有碳纖尾翼，加埋流線車身，以及車底嘅導流設計，廠方表示可以為前、後軸分別增加40kg及100kg嘅下壓力，喺無限速公路上，筆者試過加速到200km/h以上，車身依然保持高度穩定性，廠方專利嘅quattro四驅系統當然亦應記一功。

落場化駕駛環境

車廂方面，第二代R8維持雙座位布局，Plus仲有全新嘅賽車用輕量化桶椅，就連三幅式多功能軚環都分外有落場Feel，留意右下角嘅四點鐘位置多咗紅色嘅引擎啟動掣，加埋分別控制排放及駕駛模式嘅兩粒專用功能鍵，讓車主盡量保持手不離軚。儀錶板用咗全新嘅Audi Virtual Cockpit系統，以12.3吋高清屏幕為核心，可按駕駛者喜好而設定顯示資料，又可以對應導航地圖或後泊鏡頭影像。視線轉向前方中央，就會發現中控台玩瘦身，採用三圈式冷氣控制鍵對應風速與溫度，慳番唔少車廂空間；波棍台亦係新設計，最大變化係底部設有專為MMI系統而設嘅觸控式面板，以指指點點嘅方式設定多項功能，直接方便，只要你識用智能手機或者平板電腦，操作自然零難度。