神奇隊長的最後戰衣

人們說你就要離開村莊，我們將懷念你的微笑……不經不覺，「神奇隊長」謝拉特離開紅軍、轉投洛杉磯銀河有九個月了，今年一月隊長表示，有可能喺今季嘅美職聯（MLS）賽事後掛靴，可惜香港太少MLS直播，惟有靠波衫睹物思人了。新一季嘅adidas MLS波衫今日起上架開售，除咗洛杉磯銀河，仲有紐約雙雄嘅紐約城與紐約紅牛，以及有卡卡坐鎮嘅奧蘭多城。講番主角洛杉磯銀河，新波衫延續白藍黃嘅傳統配色，與上一屆相比，正面嘅綢帶圖案由藍色變成藍黃雙色，並且由之前嘅間條改為淨色，正中央嘅贊助商標誌就由HERBALIFE變為HERBALIFE NUTRITION；除此之外，adidas波衫一向喺衫袖縫上三間條紋，洛杉磯銀河嘅新戰衣就改喺兩腋之下，如此變動亦都出現喺今屆歐洲國家盃嘅波衫之上。除咗神奇隊長，原來香港球迷同樣熟悉嘅艾殊利高爾與羅比堅尼都去咗洛杉磯銀河，身為後者嘅粉絲，對呢件新波衫又有冇興趣呢？