雖然香港係石屎森林，慶幸仲有郊野公園，放假時可以去抖抖氣，不過明明係自然環境，點解公園內有咁多石屎路？好似麥理浩徑，大部分路段都鋪咗水泥，呢個邏輯，就同提議中環人放Lunch去泳棚游水一樣咁不可思議……其實依家嘅行山鞋設計咁精良，又使乜鋪水泥咁多此一舉，尤其是啱啱上架嘅adidas Terrex Skychaser，前、後中底都用咗Boost，緩震表現當然係同級之最，山路起伏再大、路況再巗巗巉巉，都唔怕行到腳仔痛啦！

Terrex Skychaser（M）$1,399

Terrex Skychaser（W）$1,399

外底物料出自Continental，耐磨、抓地、防滑兼而有之。

鞋身嘅網布結構既有不俗透氣能力，物料本身亦相當耐磨，加上大部分接合位用熱熔方式取代縫製，加強耐用性。

前、後中底都用咗Boost，緩震能力固然高，仲多咗一般行山鞋所冇嘅回彈效果。

Terrex Swift R GTX $1,099/對

與Terrex Skychaser一樣，Terrex Swift R GTX採用Lace Bungee設計，可以快速調節鞋帶鬆緊，方便之至。

TRAXION外底抓地力高，用嚟行石屎路就太嘥料了！

中底踭位用咗ADIPRENE，對於着唔慣Boost嘅用家而言較易適應。

Terrex Skychaser 緩震贏晒

adidas Boost有幾紅？唔只跑鞋、籃球鞋、波Boot，就連潮界都畀佢征服，君不見用咗Boost嘅Yeezy同NMD每次上架都被鞋粉秒殺嗎？呢期Boost就向山系進發，Terrex Skychaser嘅前、後中底都用咗呢種王牌物料，緩震能力唔只係品牌之最，仲有明顯嘅回彈表現，反觀一般嘅行山鞋都以保護性為先，緩震未必係首要考慮，更遑論回彈能力，加上成對鞋嘅結構都標榜輕量化，就以男裝UK 8.5為例，淨重只有325g，做到又輕又舒服。

除咗Boost，Terrex Skychaser仲有唔少貼心設計，例如外底用咗Continental輪胎橡膠物料製成，有齊耐磨、抓地、防滑等優點。至於鞋身嘅PRO MODERATOR可以加強中底嘅支撐及穩定性，可見Terrex Skychaser重視穿着感受之餘，喺保護性方面亦都交足貨。

Terrex Swift R GTX 無懼水淹

除咗Boost，adidas嘅山系鞋亦另有選擇，同步上架嘅Terrex Swift R GTX，雖然中底冇用Boost，不過踭位都有吸震力強嘅ADIPRENE，加埋抓地力強嘅TRAXION外底，足以應對崎嶇多變嘅山路環境。鞋面用料更加講究，既有抗撕裂、支撐力強嘅合成纖維，表面仲有防水嘅GORE-TEX處理，涉水又好、落雨又好都冇有怕。

文︰Dick

攝︰Paul、Chun

查詢︰2730 0157（尖沙咀漢口道17號adidas旗艦店）