LG K10 LTE抵玩有睇頭

近排係各大手機廠商推出新機嘅旺季，至吸引目光當然係旗艦機種，不過唔代表入門、中階機冇睇頭。好似LG中階機K10 LTE，定價$1,698，十分之吸引，特別在於機面用上弧面玻璃，設計非常靚仔，加上仲預載埋最新Android 6.0，可以搶先用到各式新功能，絕對抵玩！

$1,698

備有5.3吋720p屏幕，顯示清晰。

機背有大量坑紋，增加啜手感覺；加上依然有招牌Rear Key，單手操作好方便。

支援插卡設計，方便擴充容量。

電池有2,300mAh，加上Android 6.0令耗電量大減，續航力合格。

可以將記憶卡變作ROM使用，唔怕記憶體不足。

搭載MTK八核心處理器，跑分唔算突出，但操作都夠順暢。留意圖中的「K430」其實是K10 LTE的別稱。

用家可自訂App圖示，玩個人化一流。

試以《Viu》睇片，在4G串流下可流暢播放，而屏幕色水、可視角都唔錯。

用上2.5D弧面玻璃

K10 LTE屬LG新推出嘅K系列，成個系列目前得K10 LTE同埋K7兩部機，當中以本篇主角規格較強。雖然K10 LTE只係入門手機，不過設計上都唔怕失禮人，機面用上2.5D弧面玻璃，四邊邊緣有少少弧度，配合圓角機身，外形似足一舊卵石，都幾大方。而背殼壓上類似織紋嘅立體花紋嚟加強防滑能力，手感亦見不俗；當然唔少得品牌沿用多年嘅Rear Key設計，音量鍵同開關都擺晒喺度，手持時用食指就可以控制相關功能，習慣咗的話都幾就手。

出廠預載Android 6.0

依家唔少旗艦機都仲等緊升級用Android 6.0作業系統，但係K10 LTE竟然爬大佬頭，出廠已預載Android 6.0，並且換上自家嘅UX 4.0介面，操作雖然同舊版本分別唔大，不過反應就比預期中爽快，用家仲可以自訂每個圖示外觀，玩盡個人化。最實用就係可以將記憶卡變作內置記憶體使用，以後就唔怕內置記憶體不足，瘋狂下載Apps都冇問題。順帶一提，K10 LTE有個500萬像素前置鏡頭，並且支援手勢自拍功能，女仔Selfie就輕鬆得多。