於2011年推出嘅《鐵甲萬能俠SKL》，全數只有三集，而且香港只有影碟發行，老實講，包括筆者在內，相信唔少日漫控都唔知劇情講乜，不過就對劇中機設印象深刻，事關走出原作者永井豪嘅「樸實」作風，線條複雜不特止，全身仲棱角分明，比原來嘅萬能俠1號、2號狂野、慓悍得多，甚至帶有幾分邪氣。繼去年三月嘅「帝王萬能俠SKL」披風版後，最近SR超合金加推終極飛翼版Final Count Version，加埋獨眼龍造型，霸氣大盛！

SR超合金Mazinkaiser SKL Final Count Version 建議零售價︰¥10,500

獨眼龍造型原本好有氣勢，可惜係右眼塗裝打咗折扣。

披風版已經有嘅雙槍，飛翼版又點少得！

刀柄可以伸長，方便擺出拔刀與雙手握刀嘅甫士。

背脊既可組裝成飛翼形態，亦可變番做掛刀款式。

飛翼設計棱角分明，而翼展最長可達40cm左右。

前臂可以分離，擺出發射飛拳嘅甫士，不過既無專用地台，又無煙霧形態特效Parts，氣勢爭咗啲。

主體配色同步變奏

話說喺故事後段，SKL變咗獨眼龍，戰情陷入膠着狀態，Devilman Lady與頭上嘅飛翼Wingle分體，後者與SKL合體，變成飛翼版本戰力大增；今次嘅SR Final Count Version亦都抽走披風，改用飛翼組件，跟足機設嘅蝙蝠翼造型外，翼展最長可達40cm左右。除此之外，主體配色亦有變化，披風版嘅上臂、腰與大腿都用銀灰色，飛翼版改用黑鐵色，頭雕亦變成獨眼龍，更顯得殺氣騰騰。不過就當筆者挑剔，我仲記得喺動畫之中，SKL同Wingle合體時，右眼嘅十字傷疤會泛現紅光，雖然SR超合金嘅同樣位置都有戰損刻紋，但係顏色唔夠突出，只係黑色一片，未能將獨眼龍嘅氣勢完全展現。

牙斬刀伸縮有度

至於武器方面就與披風版一樣，有齊由胸口嘅蝙蝠翼分體變成嘅雙槍，以及最有氣勢嘅「牙斬刀」，後者嘅刀身做足光澤塗裝，刀柄又可以伸長，好處係當牙斬刀掛喺背脊時，既可做到屈肘拔刀，又可擺出雙手握刀嘅必殺甫士，而且主體本身亦有高可動性，腰間與足踝都有伸縮式隱藏關節，膊頭與髖關節又係Ball Joint款式，尤其是髖關節用金屬製成，扭動範圍大，受力度又高，美中不足係少咗煙霧形態嘅特效Parts，發射飛拳甫士未夠入戲。除此之外，頭、肩、前臂、膝頭、飛翼、雙槍與牙斬刀都布滿尖角，氣勢贏晒不過拮到入肉，筆者試玩時就因工受傷見紅，玩具迷要留意了，無謂十指痛歸心。

查詢︰2433 1828（瑞華行）

文︰Dick　

攝︰Ho Man