Nextbit Robin 100GB儲存冧到「雲」

好多人未必知3月14日係白色情人節（White Day），無論你奉行傳統女方送禮予男方，抑或學日本男方回禮畀女方，咪一樣係要揀禮物！唔想朱古力、玫瑰花咁行貨，最好就係搵啲香港冇嘅嘢。小記推介來自美國嘅Nextbit Robin手機，北歐風外形已經殺晒；特別在內置32GB容量及100GB雲端空間，兼幫你自動將相片、Apps掟上雲端備份，唔怕儲存空間「乾硬化」，經常打機、影相、拍片至啱用！

有個5.2吋全高清屏幕，表面換上Gorilla Glass 4防刮玻璃。

Mint配色獨有雙色設計，女仔見到實鍾意。

開關鍵同時兼備指紋辨識功能，最多可以加入五組指紋。

採用USB Type-C插口，旁邊設有提示燈。

卡針用上雲狀設計，有心思！

機背雲圖案下方設有LED燈，進行雲端操作時就會亮起。

當手機容量不足時，系統就會將部分App存檔（Archived），圖示即時變成灰色。

唔似得傳統Android，新機介面經過重新設計，Widget頁面需要喺主頁以兩指一Pinch先會顯示出來。

Smart Storage可以畀用家查閱容量狀況。

跟機只送USB Type-C傳輸線，火牛、機殼、芒貼都要另購，售價各15美元。

試相
1,300萬像素鏡頭解像力都唔錯，相片顏色自然，不過對焦反應稍慢。

集資量產美國機

靠集資網站Kickstarter起家嘅Nextbit，上年9月成功集資，上個月終於正式量產Robin。外形上，Nextbit Robin機身工整，喇叭、前後鏡頭、音量鍵都用上圓形設計，而機側卡槽、開關鍵就係橢圓形，按鍵仲精心地玩對稱、平衡排列，確實幾有北歐設計嘅神髓。配色同樣精彩，提供以深淺薄荷色配搭嘅Mint，以及名為Midnight嘅藍灰色，加上帶有「啞面」嘅聚碳酸酯（Polycarbonate）物料，賣相好煞食！硬件係Nextbit Robin嘅另一強項，有Snapdragon 808六核處理器、3GB RAM、5.2吋全高清屏幕、指紋辨識，仲預載Android 6.0作業系統，拍得住高階Android機。

雲端空間同步傳

此機最大特點係內置32GB儲存空間之外，仲有100GB雲端儲存空間，用家毋須將檔案逐一掟上雲端，當連接Wi-Fi網絡以及插上電源後，手機就會將相片、Apps資料同步傳至雲端；特別在手機內置容量接近爆燈時，系統就會將用家經常閒置嘅Apps同相片存檔（Archived），喺手機中抽走，檔案圖示就會即時由彩色轉為黑白；大家想再用相關檔案時，一按圖示就會即時回復（Restore）並下載到手機，咁儲存空間就幾時都咁夠用！想買部的話，大家可以去Nextbit網頁落「柯打」，定價劃一399美元，兼送貨到全球，香港運費一部35美元，兩部60美元，廠方指一個星期內送到府上。小記問過，依家會直接喺組裝地出貨，即係邊度？咪就係香港囉，隨時一、兩日就收到，有機會趕得切正日送禮！