因為尊重，所以隆重，最近adidas推出咗德國與西班牙嘅Box Set版本波衫，非球迷者見到會話：「使唔使咁誇？」但係對我哋呢班波牛嚟講就如獲至寶，事關喺我哋眼中，波衫並唔只係一件衫咁簡單，仲係一種身份認同。今次Box Set設計得咁Grand咁得體，而且筆者真心覺得定價超抵，作為德國或西班牙嘅死忠粉絲，問你點忍？

adidas DFB Collector Box Set $1,999

adidas FEF Collector Box Set $1,999

禮盒表面寫明「As Worn on Field by the Professional Players」，加埋相應嘅德文或西班牙文語句，令成套Box Set更顯優越感。

盒裝之餘再送專用Tote Bag，未開盒，淨睇Size已經夠晒霸氣。

每套都有黑色硬身包裝盒，收藏夠企理。

adizero嘅隊徽都用咗熨章款式，並非Climacool嘅繡章。

德國隊嘅右袖，已經熨咗今屆歐國盃嘅賽事臂章。

作為今屆歐國盃嘅衞冕球隊，西班牙波衫嘅右袖都有2012歐國盃冠軍嘅專屬臂章。

不分主客，德國隊及西班牙隊波衫嘅左袖都有「Respect」臂章。

留意盒框，每套Box Set都有獨立編號顯貴氣。

有齊主客 劃一落場版

雖然距離歐洲國家盃仲有三個月時間，不過adidas一早為大賽做足準備，去年年尾已經為多個參賽國家推出咗新波衫，最近仲為德國及西班牙出Box Set，而且認真大陣仗，每隊都有齊最新款嘅主客波衫各一件，仲係落場級嘅adizero版本，並非一般嘅市販版Climacool。最出位就係名副其實嘅Box Set包裝，每件波衫都放入獨立嘅透明盒內，盒邊設計成黑色粗框，似足裱起包裝嘅藝術品，每套又有一個大型黑色硬身禮盒，畀你欣賞過後，將主客波衫放番入盒內方便收藏。

驚喜價 全球限量

玩到Box Set咁特別，最初以為售價一定好離地，點知睇完Price List，實在有驚喜，每套只係$1,999。計計數先，adizero版本嘅國家隊波衫，每件原價已經係$1,099，今次唔只多咗Box Set包裝，仲送埋臂章！先講德國隊，不分主客，左右衫袖分別熨咗「Respect」臂章，以及2016歐國盃嘅賽事臂章，而胸口中間就有2014世界盃冠軍金章；西班牙都大同小異，左袖有「Respect」章，而右袖就有2012歐國盃冠軍臂章。買開波衫嘅球迷，都知道喺香港熨章有幾乸脷，閒閒哋幾百蚊一個，依家有衫有盒有章，仲要有齊主客，抵唔抵買，相信球迷心中有數。何況今次Box Set係限量生產，德國隊嘅全球發行量只有1,100套，西班牙仲少，只有605套，據知香港只係返到十零套，希望本文刊出時，忠粉仲趕得切買到。

查詢︰2527 0217（旺角通菜街63至65號adidas Football Store）、2730 0157（尖沙咀漢口道17號adidas旗艦店）

文︰Dick

攝︰Homan