最近有人突然熱情主動約我出來，說有東西找我寫，以為有Job，誰知道坐低傾落，才知道不是搵我做嘢，而是搵……嚟搞。

其實搵你做嘢但搵鬼你笨，已經不算是最悲慘最教人失望，因為搵鬼你笨，可能只是出手低一點，硬碌你人情卡，拍膊頭捱義氣，至少也是一樁工作，就算對方以「無限商機」搵鬼你笨，哄你免費提供一次性服務，你也可以找藉口推卻拒絕，但原來，有比搵鬼你笨更要命更教人失望的一個新低谷，就是借搵你做嘢之名，搵你着數。

譬如明明表面上是搵你寫嘢，有啲嘢想搵你搞，但根本一切未落實，資金未到，方向未有，只是想有啲搞作，又或者新公司剛Form，四圍搵人埋班，呃水吹，趁機套你料，如果言談之間你因為興奮過頭或者被人家開出來的空頭支票沖昏了頭，以為將來無限商機將會真的有你份，跟你攜手共創美好將來，相信一帶一路的美好願景，把你儲了很久的好點子或者珍藏好橋不慎說漏了嘴，哈哈，你以為他們將來真的會因為你的貢獻而找你合作？哈哈哈。

不過是一餐飯甚至一杯咖啡的價錢，就能呃到你的點子，不知多便宜。就算騙不到你的橋，騙到你的人脈你的Connection，探到一兩個人名，也是有賺……

各位自生自滅的Freelancer，騙徒手法層出不窮，行走江湖，敬請小心。