距離2016 NBA Playoffs只剩一個半月嘅時間,為咗爭取Playoffs入場劵,唔只球員及球隊,各路運動品牌都喺呢個Moment加強火力,Nike啱啱發表咗專為「雷神」Kevin Durant而設嘅升級版Signature Shoe—KD8 Elite;除咗提升原有功能,仲突破咗對上三代嘅低筒傳統,搖身變成高筒款式。KD8 Elite繼續由Leo Chang主理,鞋領如此大變身,佢話係出自KD本人意見,佢補充話︰「喺KD8 Elite身上,鞋、襪與貼身壓力褲之間,唔再有明顯分野。」咁講法,唔通KD從此可以着鞋唔着襪?

KD8 Elite嘅先發版本採用全白色設計,將於4月14日開售。

鞋身前半段嘅Flywire結合Kevlar嘅Aramid纖維,抗扭能力特別高。

唔只增加鞋領高度,足踝位置仲有重點保護設計,畀到用家更大安全感。

KD8 Elite嘅「高筒」部分,真身係一個壓力襪套,採用內建式設計,與鞋身連成一塊,唔只將整個足踝包裹起嚟,領口仲伸延至小腿,藉此加強支撐作用。鞋身結構亦有大改動,鞋身前半段既有Flywire,仲結合咗Kevlar嘅Aramid纖維,後者唔只夠輕,又有極高嘅抗扭能力,與相同質量嘅鋼鐵相比,強度高達五倍,可以針對性地加強對腳掌嘅鎖定效果。至於KD8備受讚譽嘅全掌式Zoom Air,KD8 Elite亦100%繼承,繼續發揮全面而靈敏嘅緩震表現。根據官網資料,全白色嘅KD8 Elite將於4月14日開售,至於灰色及黑色版本,分別於5月5日與5月26日接棒推出,KD嘅球迷要Mark實以上日子了。

文︰Dick